标题:
[灌水]
“轧”字打头的上海闲话（沪语）
[打印本页]
作者:
老叟
时间:
2013-3-9 07:33
标题:
“轧”字打头的上海闲话（沪语）
上海闲话里有勿少带“轧”字个词语，大多还是搭普通话里“挤”字个意思差勿多，也有其他比较微妙个意思，稍微收集仔一眼搭“轧”搭界个上海闲话，靠一只脑子勿来事，肯定是挂一漏万，搭大家一道“茄茄三胡”，请大家补充指正：
“轧公交车”、“轧地铁”上下班；参观世博会个观众“轧”得勿得了；“伊屋里向19个平方个房间，要‘登（住）’5个人，‘轧’煞脱了”……搿种闲话个意思，基本浪侪是表达拥挤不堪，“轧”得来吃勿消。
“轧煞老娘有饭吃”，迭句闲话有眼历史，要追溯到抗日战争个辰光，上海沦陷，日本“出佬”严格管制粮食，伊歇辰光个上海老百姓为仔吃饭，拼仔老命“轧”“户口米”，七十岁朝上个上海人曾经经历过。阿拉小辰光已经乃“轧煞老娘有饭吃”当游戏白相，搿个已经是解放后头个事体了。
“轧进”、“轧出”搭仔“轧进轧出”。“轧进”，一般总归是好事体：“侬外孙额角头真高，‘轧进’高考重点大学分数线，乃总笃定白相，等录取通知好唻。”“阿拉屋里齐巧‘轧进’拆迁，总算好登（住）新房子了，用勿着再拎马桶了。”，勿要忒开心啊！
“轧出”，就蛮难讲了。“我个老同学拉爷，1949年10月参加革命个，眼眼条‘轧出’，勿好享受离休干部待遇。”搿是老遗憾个事体；“我初中毕业还唔没满十五足岁，年龄正巧‘轧出’，勿好考中专、技校，只好去读高中。”葛佬（所以）迭个“轧出”，是额角头还是触霉头，蛮难讲个。
“轧进轧出”，情况复杂。辣上海闲话里，“轧进轧出”就是可进可出，能够通融个说话，个末就进去了。勿好商量呢，就只好委屈了。退休、病退，参军入伍，碰着岁数“轧进轧出”；学生子读书升学考试，碰着分数“轧进轧出”；老早子单位分房子，碰着人均居住面积“轧进轧出”……总之，“轧进轧出”个辰光。只好碰运道，寻门道了。
“轧一脚”，也可以讲“茄一脚”。意思是沾光、沾边、硬凑上去，有一种“附”上、“粘”上个味道。“侬又叉勿来麻将，弄弄就输脱，输脱仔没‘哭出乌拉’，帮帮忙唻，侬就勿要来‘轧一脚’唻”。“朋友，侬那能搞头经个啦，随便啥事体侪要来‘轧一脚’”，迭个是熟悉个朋友善意个规劝。
“轧苗头”（或“格苗头”），属于情商范畴里个一句典型个上海闲话。“轧苗头”有可能与生俱来，但多数还是长期个工作、生活个经验或者教训，逐步逐步掌握个为人处世个本事，“轧苗头”个词义属于中性，勿同个人物、场景，或许有勿同的含义。饱经世故个长者会搭后辈讲：“辣辣社会浪，要学会‘轧苗头’，头子要活络……”云云；“刚刚侬戆伐，讲出迭种闲话，拨人家笑歪嘴巴，‘苗头’也勿轧轧个！”，勿“轧苗头”，要吃苦头。
“轧牢”，“阿拉迭部缝纫机老得唔没牙齿了，踏法踏法线脚就‘轧牢’，好笃（扔）脱伊了”。
“轧闹猛”，又是一句典型个上海闲话。老早子物资匮乏，走辣马路浪，看见交关人辣辣排队，反应灵敏个朋友马上会排上去，搭排辣伊后头个人打个招呼：“朋友，我排辣侬前头哦，我到前头去看看叫，勿晓得排队买啥物事，对勿起啊！”明明还勿晓得买啥个物事，勿管三七廿一，排上去再讲，生怕勿“轧”迭个“闹猛”会得吃亏。
围观外国人个“轧闹猛”已经成为历史。现在，买葱油饼要排队“轧”了，淮海路“光明邨”买熟食要排队“轧”。上海人欢喜“搨便宜货”、“淘便宜货”，搿个“轧闹猛”是上海人个美德，勤俭持家、艰苦奋斗，节省每一个来之不易个铜板，“千钿要用，一钿要省”，搿能介个“轧闹猛”无可非议。
上海是个特大城市，常住人口达到两千多万，相当于欧洲一个中型国家个全部人口啊！上海个人口密度特别大，马路浪车子“轧”，菜场、医院里人“轧”，公交车、地铁乘客“轧”，周末个超市付钞票“轧”，世博会曾经“轧”过7000万人（次），还有交关上海人搭仔外来人口“轧”辣老房子里，勿管是外地人还是外国人，到仔上海个第一印象就是一个字：“轧”！
欢迎光临 〖嘉城社区网〗 (http://788028.bri3cmdi.asia/)
Powered by Discuz! 7.0.0
